2025 жылғы 19-21 қараша аралығында Алматыда Қазақ онкология институтының базасында онкология көшбасшыларының І Еуразиялық форум-кездесуі өтті. Бұл шара Қазақстан, Әзірбайжан, Қырғызстан, Өзбекстан, Тәжікстан және Түркияның мамандарын біріктіріп, озық тәжірибе алмасу, хирургия мен сәулелік терапиядағы жаңа технологияларды таныстыру, сондай-ақ жоғары технологиялық онкологиялық көмек саласындағы халықаралық ынтымақтастықты нығайту үшін маңызды алаңға айналды.
19-20 қараша аралығында қатысушылар онкоурология, онкогинекология және маммологиядағы заманауи роботтандырылған операциялармен танысты. Мамандар радиациялық онкологияда заманауи желілік жеделдеткіштерді, бейімделген сәулелік терапияны және 3D-технологияларды пайдалану мүмкіндіктерін көрсете отырып, қазақстандық мамандардың кәсібилігінің жоғары деңгейін атап өтті. Бұл технологиялар шетелдік азаматтардың тұрақты қызығушылығын қалыптастырып отыр: жыл сайын КазОРҒЗИ-да 150-ден астам шетелдік пациент ем қабылдайды, бұл отандық онкологиялық қызметке деген сенімді арттыра түседі.
Бағдарламаның жалғасы ретінде сүйек және сүт безі ісіктері кезіндегі реконструктивті-пластикалық араласуларды, сондай-ақ ең аз инвазивті технологияларды — радиожиілік, микротолқынды және криоабляцияны қамтыған шеберлік кластар мен демонстрациялық операциялар өтті. Форум пациенттерді емдеу мен оңалтудың өмір сүру сапасын арттыруға бағытталған инновациялық тәсілдерін енгізуді атап өтті.
21 қарашада өткен негізгі ғылыми-тәжірибелік сессия барысында қатысушы елдердің өкілдері онкологиялық қызметтердің жұмыс тәжірибесімен бөлісіп, саланы дамыту келешектері мен түркітілдес елдердің онкологиялық конгресі аясындағы бірлескен жобалардың мүмкіндіктерін талқылады.
Форумның маңызды нәтижелерінің бірі – Қазақстан, Әзірбайжан, Қырғызстан, Өзбекстан, Тәжікстан және Түркия онкологтарының Консорциумын құру туралы меморандумға қол қойылуы болды. Консорциумның төрағасы болып ҚазОРҒЗИ Басқарма Төрағасы Ербол Жасұланұлы Бекмұхамбетов бірауыздан тағайындалды. Сондай-ақ, қазіргі заманғы емдеу әдістерін енгізуге және жоғары технологиялық онкологиялық көмектің қолжетімділігін арттыруға бағытталған 2026-2028 жылдарға арналған онкология саласындағы ынтымақтастықтың Жол картасы бекітілді.
Консорциумның бастамасы қатысушы елдер арасында халықаралық серіктестікті нығайтып, медициналық туризмді дамытуға бағытталған. Форум әрбір екі жыл сайын өткізіледі, бұл ретте негізгі назар жас онкологтарды қолдау мен дамытуға аударылады, оларға кәсіби өсу және халықаралық байланыстар орнату үшін тұғырнама беріледі.
Форумның өткізілуі Қазақстанның инновациялық технологияларды және жоғары технологиялық емдеу әдістерін енгізу саласындағы көшбасшылығын айқын көрсетті, бүгінгі таңда қазақстандық клиникаларда қолданылып жүрген табысты халықаралық тәжірибелерді паш етті және өңірдегі онкологиялық қызметті бірлесіп дамыту үшін жаңа мүмкіндіктер тудырды.
