Ішімдікті тұтынудың қауіпсіз деңгейі жоқ.
Ішімдік, темекі сияқты, канцероген болып табылады, ал оны тұтынудың қауіпсіз деңгейі жоқ. Бұл туралы Дүниежүзілік денсаулық сақтау ұйымы (ДДҰ), АҚШ Ауруларды бақылау және алдын алу орталықтары (CDC) және Американдық обырды зерттеу институты мәлімдеді.
Халықаралық сарапшылардың мәліметінше, тіпті аз мөлшердегі алкоголь – күніне бір стандартты ішімдіктен аз болса да – кем дегенде жеті түрлі онкологиялық аурудың даму қаупінің жоғарылауымен байланысты. Олардың қатарында бауыр, сүт безі, ауыз қуысы, тамақ, өңеш, көмей және тоқ ішек қатерлі ісіктері бар. Сондай-ақ, алкоголь асқазан, ұйқы безі және қуық асты безі қатерлі ісіктерінің дамуымен байланысты болуы мүмкін.
«Денсаулыққа қауіп кез келген алкогольді ішімдіктің бірінші тамшысынан басталады. Бір ғана нәрсе анық: адам неғұрлым көп ішсе, соғұрлым зиян артады», — деп атап өтті ДДҰ өкілі доктор Карина Феррейра-Борхеш.
Лос-Анджелестегі Калифорния университетінің Интегративті онкология орталығының тамақтану жөніндегі аға маманы Эмма Вейё алкогольді тұтынудың мөлшері мен жиілігі маңызды екенін атап өтті. Оның айтуынша, тұтынудың аздап қысқаруы да онкологиялық қатерлерді төмендетеді.
2020 жылғы зерттеуге сәйкес, алкоголь жыл сайын бүкіл әлем бойынша 740 мыңнан астам жаңа обырдың пайда болуына себеп болады.
Сарапшылар сондай-ақ қызыл шараптың пайдасы туралы кең тараған пікірді жоққа шығарады. Ресвератрол антиоксидантының болуына қарамастан, мамандардың айтуынша, этанолдың зияны әлеуетті пайдадан едәуір асып түседі. Ресвератролдың неғұрлым қауіпсіз көздерін денсаулыққа қауіп төндірмей өсімдік тағамдарынан алуға болады.
