Жамбыл облыстық онкология және хирургия медициналық орталығының базасында Қазақ онкология институтының онкохирургы Серік Менбаев пен ординатор Дулат Көкімбаевтың қатысуымен D2 лимфодиссекциясымен лапароскопиялық гастрэктомия жүргізілді.
Операция Қазақ онкология институты мен өңірлік онкологиялық орталықтар арасында тәжірибе алмасу және озық технологиялар трансферті бағдарламасы шеңберінде орындалды.
1960 жылы туылған пациент асқазан қатерлі ісігі (аденокарцинома, HER2-теріс, PDL1 — 35%, Ki-67 — 6%) диагнозымен емделуде болды.
Неоадъювантты полихимиотерапияның 6 курсынан өткеннен және ПЭТ-КТ жүргізгеннен кейін оң динамика — негізгі ошақ пен метастатикалық лимфа түйіндерінің азаюы тіркелді, бұл хирургиялық араласуды жүргізу туралы шешім қабылдауға мүмкіндік берді.
Операция сәтті өтті. Пациент одан әрі мамандардың бақылауымен ем алады.
Мұндай бірлескен жобалар өңірлердің онкологиялық қызметтерін нығайтуға, хирургияның қазіргі заманғы аз инвазивті әдістерін енгізуге және Қазақстан халқына онкологиялық көмектің қолжетімділігін арттыруға ықпал етеді.
