2025 жылғы 5 қарашада Қазақ онкология институтында Жамбыл облысы денсаулық сақтау басқармасының делегациясымен жұмыс кездесуі өтті. Талқылаудың негізгі тақырыбы онкологиялық қызметті ұйымдастырудың өзекті мәселелері және өңір халқына мамандандырылған медициналық көмектің сапасы мен қолжетімділігін арттыру болды.
Кездесуге Қазақ онкология институтының Басқарма төрағасы Ербол Жасұланұлы Бекмұхамбетов, Жамбыл облысы Денсаулық сақтау басқармасының басшысы Сержан Назарбек Сәрсенбекұлы, ҚазОРҒЗИ қызметкерлері, сондай-ақ өңірдің медициналық-санитариялық алғашқы көмек (МСАК) ұйымдарының бас дәрігерлері қатысты.
Пікірталас барысында бірлескен жұмыстың негізгі бағыттары қаралды:
- онкологиялық ауруларды ерте анықтау жүйесін жетілдіру;
- МСАК ұйымдары мен онкологиялық қызмет арасындағы өзара іс-қимылды күшейту;
- пациенттерді бағыттауды оңтайландыру;
- скринингтік бағдарламалардың тиімділігін арттыру.
Сапар аясында жамбылдық дәрігерлер Алматыдағы № 17 қалалық емхананың жұмыс тәжірибесімен танысты. Қонақтарға пациенттерді бағыттау мен ағындарға бөлудің тиімді тәсілдері, онкосақтық маркерлерінің онлайн-мониторингі бар ахуалдық орталықтың қызметін ұйымдастыру, скринингтік тексерулер жүргізу және онкологиялық орталықпен өзара іс-қимыл жасау көрсетілді. Созылмалы аурулармен ауыратын пациенттерді сауықтыру және онкологиялық қатерлерді басқаруға арналған цифрлық құралдарды енгізу мәселелеріне ерекше назар аударылды.
Сапар қорытындысы бойынша бірқатар тәжірибелік ұсыныстар әзірленді, оның ішінде:
- ісік алды жағдайларын анықтау бойынша стоматологиялық кабинеттермен өзара іс-қимылды күшейту;
- онкосақтықты арттыру үшін халық арасында ақпараттық-ағарту жұмыстарын жүргізу;
- Тараз қаласында скринингтік зерттеулерді орталықтандыру бойынша ұсыныстар әзірлеу;
- МСАК деңгейінде «жасыл дәліз» үйлестірушілерін тағайындау.
Кездесу сындарлы ахуалда өтті және онкологиялық аурулармен күрес жөніндегі бірыңғай мемлекеттік стратегия шеңберінде Қазақ онкология институты мен өңірлік денсаулық сақтау органдары арасындағы серіктестікті нығайтудағы кезекті қадам болды.
